Ferie uf Balkonie.

Es git die Aabige woni ufem Balkon hocke.

I trinke es Glas, zuegäh meist ä Fläsche, Wyy,

Luege chuum ufs Handy, sinniere übers Läbe

Mis Läbe.

I weiss nid, wies öich geit, aber i bi sehr schnäu sehr begeisteret vore Person.

Das passiert öppe so au 6 Monet bis 1 Jahr.

Da lehri öpper kenne, und merke sehr schneu "i bi fasziniert vo dere person."

Und:

"I möcht mit dere Person mis Läbe teile."

Ja und jetz hocki hie uf dem Balkon.

Liecht bsoffe, wott rede. Mit dere Person, über Gott und die Welt.

Wiu eigentlech hani mi gloubs wider einisch i sone Person verliebt.

Meistens, oft, eigentlech immer, weissi nid, ob das würklech Liebi isch.

I weiss ehrlechgseit nid würklech, wie sech romantischi, nid fründschaftlechi, Liebi ahfüehlt, wenn si vo mir us chunnt. Fründe si klar, die het me gärn, wiu si toll si.

Romantischi Liebi, wie differenziert sech die? Isches Sex? Das fändi ä längeiligi Antwort. Vilech gits eifach ke Antwort uf die Frag. Oder vilech kenni se nid, wiui vilech no nie würklech verliebt bi gsi. Tönt nach sich sälber bemitleide. Isches das?

Zrügg zum Thema. I wett dere Person schribe. I wett Kontakt ha, frage wies geit, ob si Lust het ufne spätabendleche Spaziergang.

Mache mir aber viu z'viu Gedanke.

Vilech isch si grad mit öpper anderem ungerwegs.

Vilecht schlaft si hüt mitere andere Person.

Die Gedanke mache mi kaputt.

I würd ines Loch gheie.

Es loch, woni mir aber ou sälber grabe ha.

Mini Gfüu wetti drum oh nid ahspräche.

Vilech ischs Angst vorem schitere.

Vilech ischs Angst, dass die Gfühl wider verschwinde und ig die Person dür das unfair behandle. Oder öppis irreparabel kaputtmache.

Was machsch aso. Blibsch eifach hocke, ir naive Hoffnig, dass plötzlech vo besagter Wunschperson äs WhatsApp ufploppt?

Cha ja unmöglech ä Lösig si, ds Läbä i d händ vo Drittpersone z'lege.

Söui auso eifach schribe? Es "Hey, wie geits?"

I hätt angst vor dr Antwort.

Angst, dass öppis chunnt, woni nid erwarte.

Angst, dasi merke, dasi im Läbe vo dere person nid di glichi Stellig ha wie si i mim.

Und anstatt mi dere Angst ds stelle,

machi gar nüt.

Warte ufe erst Schritt vom gegenüber, wiu dä cha mi ja nid verletze.

Es isch gäbig. Drvorenne, sech sini Troumwält schaffe.

Wiu solang me nid schwarz uf wyss gseht, dass si Bsuech vo öpper anderem het, cha das si – oder äbä oh nid.

Schrödingers Beziehungsstatus.

Legi mini Hoffnig doch i d Händ vom Universum, das wird scho regle.

Entweder es git mr öppis guets.

Oder es git mr ds Gägeteil. Und de weisi, dass niemer anders a mim unglück schuld isch, als ig sälber. Wiui widermal us angst vorem schitere nid initativ gnue bi gsi.

Ferie uf Balkonie si toll.